Волгоград өлкәсендә яшәүче хатынны үз әнисен тереләй җиргә күмеп куйган өчен хөкем иткәннәр. Ул 8 ел төрмәдә утырачак. Бу турыда Тикшерү комитетына сылтама белән РИА Новости хәбәр итте.
Җинаятьче хатын анасына чүкеч белән суга, буа һәм әле үлмәгән килеш чокырга ыргытып, күмеп куя.
Төбәк буенча Тикшерү идарәсе белешмәсе буенча, быел июньдә Ольховка авылында 52 яшьлек хатын исерек кызы белән талаша. Кыз чүкеч ала һәм анасының башына берничә тапкыр суга.
Тикшерү версиясе буенча, шуннан соң яшь хатын анасын буа, олы хатын аңын югалта. Яшь хатын анасын ишегалдына алып чыга, чокырга ыргыта һәм күмә.
Экспертлар ачыклаганча, әни кеше «сулыш юлларына туфрак эләгү сәбәпле механик асфиксиядән үлә».
«Үтерү» маддәсе буенча җинаять эше ачыла.
«Суд карары буенча, гаепле хатынга 8 елга ирегеннән мәхрүм итү рәвешендә җәза бирелә. Ул бу вакытны гомуми режимлы колониядә уздырачак», – диелә ведомство хәбәрендә.