Ришат Төхвәтуллинның хатыны Алия (Карачурина) социаль челтәрдәге сәхифәсендә виртуаль дусларын кызыксындырган сорауларга җавап биргән.
– Гастрольләргә йөрмәгәч, нәрсә белән булса да шөгыльләнергә уйлыйсызмы?
– Нормаль кешеләр кебек үз өемдә яшәячәкмен, ә кунакханәләрдә түгел. Әмма аның да күңелле, рәхәт яклары бар инде. Ремонттан соң фатирны җиһазландырачакмын, сезнең белән тәкъдимнәрне уртаклашырмын, социаль челтәрдәге сәхифәмне алып барырга һәм сезнең белән аралашырга күбрәк вакытым булачак, – дигән җырчы.
– Ирең (Ришат Төхвәтуллин) белән эшләү авырмы? Гел бергә булгач, бер-берегездән тую хисе юкмы? – дип тә кызыксынганнар.
– Алай авыр димәс идем. Әмма эштә төрле вакыт була. Үзеңне өйдә кебек түгел, ә һәрвакыт эштә кебек тотарга кирәк. Ә яраткан кешең синең белән яраткан кешесе белән кебек түгел, ә хезмәткәре буларак сөйләшә башлый икән… Минем күңелгә тия, авыр. Әмма без бергә күпне күрдек, күпне кичердек. Бу – безнең мөнәсәбәтләрне сынау булды. Кирәк дип тоям икән, иремне һәрвакыт хупларга тырышам. Киресенчә, без янәшә булмаганда, авыр булыр дип уйлыйм, – дип җавап биргән Алия.
