Яшь әти яңа туган баласын елгадагы бозлы суга илтеп ташлаган
Сабыйның мәете әлегә табылмаган.
21 мартта Красноярск шәһәрендә 27 яшьлек ир-ат яңа туган баласын Енисейдагы бозлы суга илтеп ташлый. Бу турыда "Комсомольская правда" яза.
Аноним шалтыратучы иртәнге дүртенче яртыларда полициягә шул турында сөйли. Урынга хокук саклаучылар бара. Әлеге ир-ат сүзләренчә, аның 32 яшьлек хатыны үле бала тапкан. Сабыйны җирлисе урынга, ул шундый вәхши ысул белән баладан котыла. Кызганычка, әлегә баланың мәетен тапмаганнар. Шуңа күрә бала исән туганмы, әллә чыннан да үле булганмы икәнен ачыклау мөмкин түгел. Ата белән ана кешене тоткарлап, полициягә алып киткәннәр.
32 яшьлек хатынның рәсми рәвештә теркәлгән психиатрия диагнозы бар, аны үз аңында түгел дип тапканнар. Моңа кадәр бу хатын урлау һәм үтерү өчен хөкем ителгән. Олы баласын аннан опека органнары алып киткән булган. Аның ире исә моңа кадәр законга каршы гамәлләрдә тотылмаган. Тикшерү бара, диелә хәбәрдә.