«Әнине дә яратам, әтине дә яратам» – Гөлназ Закированың 3 яшьлек кызыннан самими шигырь

Бу көннәрдә балалар бакчаларында бәйрәм чаралары гөрли. Социаль челтәрләрдә әти-әниләре балаларының матур итеп җырлаган, биегән, шигырь сөйләгән видеолары белән уртаклашалар. Нәниләрнең саф татарча иҗади номерларын каравы күңелгә аеруча да рәхәт. Чаллыда яшәп иҗат итүче җырчы, композитор Гөлназ Закированың кызы Ләйләнең дә Әниләр бәйрәмендә бик матур итеп татарча шигырь сөйләгәнен мессенджерлардагы статуслар аша күреп алдык.

Ләйләгә әле 3 яшь кенә. Шуңа да карамастан, сабый шигырьне бик сәнгатьле, дөрес итеп сөйли. Ни дисәң дә, артист кызы шул!

«Ләйлә узган ел гына балалар бакчасына йөри башлады. Татар төркеменә бирдек. Үзебез дә балаларыбыз белән өйдә бары тик татарча гына сөйләшәбез. Шуңа да Ләйләнең теле саф татарча һәм бик иртә ачылды. Бәйрәмдә Эльвира Сафинаның «Яратам» дигән шигырен сөйләде», – диде безгә Гөлназ Закирова.

Гөлназ Закирова тормыш иптәше белән 2 бала тәрбияли. «Интертат»ка әңгәмәдә җырчы уллары Илдарның да татар теленнән олимпиадаларга йөрүе, татарча җырлар җырлавы, мәктәптәге башка балаларны да татарча сөйләшергә илһамландырып йөрүе турында сөйләгән иде.