Яраланган хәрби, счетыннан 3 млн сум алган хатынын гаепләп, полициягә мөрәҗәгать иткән

Красноярскида бер хатын-кыз махсус хәрби операциядә катнашкан һәм яраланган элекке иренең счетыннан 3 млн сум акча алган. Бу хакта «База» Телеграм-каналы яза.

36 яшьлек ир-ат полициягә 13 октябрьдә мөрәҗәгать иткән. Ул җәй көне яралана һәм берникадәр вакыт дәвалануда була – шул вакыт эчендә ир-атның счетына хәрби операциядә катнашкан һәм яраланган өчен акча күчә. Хәрби дәваланып беткәч, депозитын тикшерергә уйлый, тик анда акча калмаган була. Ир-ат фикеренчә, акчаны аның элекке хатыны урлаган: хатынының картасы аның счетына беркетелгән була.

Тикшерүчеләр дә бу ир-ат белән килешә. «База» мәгълүматларына караганда, алар хәрби белән булган хәлне раслаган һәм «аеруча зур суммада акча урлау» буенча җинаять эше ачкан. Әлегә хәрбинең элекке хатынын тоткарлый алмаганнар, аны эзләүгә биргәннәр.