Яңгырда калып чыланганнан соң, Гөлназ Асаева социаль челтәрләр аша иреннән яңа машина алып бирүен таләп иткән. Бу хәл такси җырчыны кирәк урынга илтеп җиткермәгәннән соң килеп чыккан. Вильдан минивен сатып алганнан соң, Гөлназ үзенең гаилә автомобилендә йөри алмавын әйткән. Бу хакта «Мой Башкортстан» сайты яза.
«Мин бик усал бүген. Чыланып беттем. Минивенны йөртә алмыйм, ул минем өчен артык зур. Хәзер Вильданга сайларга туры киләчәк: минивенны башка машинага алыштыра, яки миңа яңа машина сатып ала. Мин башка болай булдыра алмыйм», — дип, үзен кызгануы хакында сөйләгән Асаева.
Дөрес, Гөлназның үпкәсе озакка бармаган, ул ире белән тиз дуслашкан. Гөлназ Асаева әйтүенчә, Вильдан хатынын ресторанга чакырган, һәм җырчының иренә карата бөтен дәгъвалары юкка чыккан. Шулай ук аңа дус кызларының җылы сүзләре дә ярдәм иткән. Чөнки Гөлназның кәефсезләнүе чыгыш ясау өчен образ сайлаганда ук башланган. Кыска вакыт эчендә сәхнә күлмәге табарга кирәк булса да, кибетләрдә җырчының күңеленә ятышлы кием очрамаган. Дус кызлары Гөлназны бик матур булуын һәм аңа теләсә-кайсы кием килешәчәген әйтеп юатканнар.