Янгын вакытында әни кеше өч баласын өченче кат тәрәзәсеннән аска ыргыткан
Сабыйларны аста җәймә тарттырып, төзүчеләр тотып алган.
4 сентябрьдә Новосибирск шәһәрендә 9 катлы йорттагы бер фатирда янгын чыга. Шул чакта әни кеше өч нәни баласын өченче каттагы тәрәзәдән аска ыргытырга мәҗбүр була. Сабыйларны аста тотып алган төзүчеләрне бүләкләргә җыеналар. Бу турыда РЕН ТВ каналы өлкә буенча Тикшерү комитетына сылтама белән хәбәр итте.
«Геройлык, батырлык һәм актив гражданлык позициясе күрсәткән өчен, Сажин О.А., Романенко С. В., Валиев Р.А.ны бүләкләү турында документлар әзерләнә», — диелә ведомство хәбәрендә.
Якынча версия буенча, хатын төтен исенә уянып китә. Ул өч баласын ала һәм балконга чыга. Хатын ярдәм сорап кычкыра башлый. Бу вакытта биредән төзелеш компаниясенең монтажлаучылары китеп бара торган була. Алар тиз генә тәрәзә төбенә килә, аста җәймә тарттыралар. Хатын аларның командасы буенча балаларны тәрәзәдән аска төшереп җибәрә. Фатирдагы тагын өч кеше бауларга ябышып аска төшә.
Балаларны хастаханәгә китергәннәр. Аннары аларның хәле канәгатьләнерлек булгач, өйләренә җибәргәннәр.
Тикшерү эшләре бара, диелә бу хәбәрдә.