Башкортстанның Яңавыл шәһәрендә фатирда газ шартлагач, күршеләрнең тимер ишекләренә кадәр ватылган. Бу турыда Гадәттән тыш хәлләр министрлыгына сылтама белән «Башинформ» хәбәр итте.
Гадәттән тыш хәл кичке 8нчедә 5 катлы йортның өске катында булган. «Газ-һава катнашмасы шартлады», – дигәннәр ведомствода.
Шуннан соң фатирда 3 пластик тәрәзә, керә торган ишек, ДСП стена ватылган. Баскыч мәйданчыгында күрше 2 фатирның тимер ишекләре бәреп ватылган.
Янгын чыкмаган. Фаҗига урыныннан ир-атны хастаханәгә алып киткәннәр, ул бик авыр хәлдә. Ул фатир хуҗасымы, әллә күрше фатирда яшиме икәне хәбәр ителми.
Гадәттән тыш хәл сәбәпләрен экстрен хезмәт вәкилләре ачыклый, диелә хәбәрдә.
Фото: © Гадәттән тыш хәлләр министрлыгы, https://www.bashinform.ru