25 февральдә Башкортстанның Яңавыл шәһәрендә шәхси йортта 69 яшьлек хатын-кыз һәм 26 яшьлек ир-ат мәете табыла. Аларда көнкүреш газы исе белән агуланып үлү билгеләре була. Гадәттән тыш хәлләр министрлыгы белешмәсе буенча, алар әниле-уллы булып чыккан. Бу турыда «Башинформ» яза.
«Электрогазета» белешмәсе буенча, мәрхүм егет – рэп-музыкант Александр Капитанов (псевдоним «Kapitan») һәм аның анасы Алевтина. «Kapitan» үзе җырлар яза, башкара, берничә сингл яздырган.
Капитановлар 2 көн элемтәгә чыкмагач, ишекләрне дә ачмагач, туганнары чаң суга башлый. Аларның ишегалдында газ һәм төтен исе була. Гадәттән тыш хәлләр министрлыгы һәм полиция хезмәткәрләре ишекләрне ватып ача. Өйдә әниле-уллы 2 мәет табыла.
Аларны 27 февральдә Яңавылда җирлиләр.
Тикшерү бара, диелә хәбәрдә.