Яна торган йортта калган өч сабыйны яшүсмерләр коткарган
Коткаручылар килеп җиткәнче 15 һәм 16 яшьлек ике үсмер өч сабыйны яна торган йорттан алып чыга.
Хакасиядә яшүсмер балалар яна торган йорттан өч баланы коткарган. Җиде айлык малай, дүрт яшьлек һәм унбер яшьлек кызлар янгын чолгап алган йортта калган булган. Бу турыда «Вести» каналы хәбәр итте.
Красноозерное авылындагы бер йортта янгын чыга. 15 һәм 16 яшьлек үсмерләр фаҗигане күреп ала. Алар янгын сүндерүчеләргә хәбәр итә. Үзләре шул арада сабыйларны йорттан алып чыга.
Янгын электр җиһазларын дөрес кулланмаганга килеп чыккан булуы ихтимал. Төбәк буенча Гадәттән тыш хәлләр министрлыгы батыр яшүсмерләрне бүләкләргә җыена.