Гамәлдәге законнар буенча, 2025 елның декабрендә оешма хезмәткәрләре хезмәт хакын 30 декабрьдән дә соңга калмыйча алачак, чөнки бу көн – озын яңа ел бәйрәмнәре алдыннан ахыргы эш көне. Бу хакта РЕН ТВ сайты яза.
Бу таләп милек формасы һәм оештыру-хокукый структурасына бәйсез рәвештә бөтен компанияләр өчен дә актуаль. Хәтта хезмәт хакы түләүнең төгәл көннәрен билгеләгән (мәсәлән, 5се һәм 20се көннәрендә) оешмалар да түләүләрне яңа ел яллары башланганчы биреп бетерергә тиеш.
Һәр компаниянең хезмәт хакы түләүнең вакытын билгели торган эчке документы булырга тиеш. Әлеге документ коллектив килешү, хезмәт хакы турында нигезләмә яки фирма җитәкчелеге раслаган башка акт рәвешендә булырга мөмкин. Законнар бер генә шартка юл куя: даталарны күчерү бары тик түләүләрне тизләтү өчен генә була ала.
Гыйнвар – озын яллар аркасында традицион рәвештә эш көннәре аз булган ай. Шулай да, эш көннәре аз булуга бәйсез рәвештә, күпчелек хезмәткәрләр үзләренә тиешле сумманы тулысынча ала.
«Гыйнварның беренче яртысы өчен аванс, чыннан да, гадәттәгедән азрак булырга мөмкин, чөнки берничә эш көне өчен генә түләнә. Әмма ай ахырында ахыргы хисап ясаганда, бу – тулысынча компенсацияләнә», – дип сөйләгән депутат Никита Чаплин.
Бәйрәм көннәрендә эшләүче хезмәткәрләргә түләүнең арттырылган ставкасы каралган. Мондый эш кимендә 2 тапкыр арттырып түләнә яки, җитәкче һәм хезмәткәр килешүе буенча, өстәмә ял көне белән алыштырыла.
Бухгалтерия түләүләр графигындагы барлык үзгәрешләр турында персоналга вакытында хәбәр итәргә тиеш.
Белгечләр оешма җитәкчеләренә, бәйрәм алды чорында финанс хезмәтләргә йөкләнеш артуны исәпкә алып, исәп-хисапларның вакытында башкарылуына аерым игътибар бирергә киңәш итә.
Ә хезмәткәрләр декабрь һәм гыйнвар түләүләренең күчүен һәм аванс суммасының ничек үзгәрүен оешма бухгалтериясеннән белешергә тиеш.
