Яман шеш белән авырган Айгөл Фазыйловага "бу дөньяда эшләрен тәмамларга" киңәш иткәннәр

Казанда яшәүче Айгөл Фазыйлова, яман шеш белән авыру сәбәпле, үзе исән чакта улына гаилә табарга теләве хакында мөрәҗәгать белән чыккан иде. Бу хәлдән соң Айгөлне Малахов үз тапшыруына чакырды һәм аның турында бөтен ил белде. Айгөл телевидение аркылы халыкка мөрәҗәгать иткәч, Әмиргә опекунлыкны Айгөлнең 67 яшьлек апасы Рәхилә алмакчы иде. Татарстан Президенты Рөстәм Миңнеханов фатир, балалар бакчасы, Әмирнең футбол тренировкалары өчен түләүне оештырды. 

30 яшьлек Айгөл берничә ел инде күкрәк рагыннан интегә. Табиблар әйтүенчә, дәваланырга шанслар юк диярлек. Айгөл улын ялгызы тәрбияли. Ул балага узуга ук малайның әтисе аны ташлап киткән. Әмма Айгөл кул кушырып утырмый - ул баласын да тәрбияли, дуслары белән дә очраша, кайвакыт бәхетле булуы турында да яза.

Айгөл үзенең хәле турында даими рәвештә Инстаграмга язып тора. Апрельдә узган томография нәтиҗәсендә Айгөлнең маңгайдагы матстазалары1,3 һәм 1,4 мм үскәне, аңкау өстендә 25 мм га 15 мм киста барлыкка килүе, сөякләрендә күпсанлы метастазалар булуы билгеле булды. 

Айгөл май бәйрәмнәрендә Адлерда ял итте. Ял вакытында ул үзенә уколлар ясаган, шул сәбәпле аның аягында шеш барлыкка килгән иде. 21 майда бу шешне алу өчен операция ясадылар. Операциядән соң ул үзен начар хис итүе турында язды. Соңрак исә хәле яхшыраюын әйтеп укучыларын сөендерде.

Хәзер Фазыйлова 7 яшьлек улы Әмир белән хосписта яши. Улы быел гына бакчага йөрүдән туктады. Күптән түгел Айгөлнең үпкәсенә җыелган сүлне чыгарганнар.