Күпләр яраткан каймаклы-эремчекле бәлешләрнең бик тиз әзерләнә торган рецептын «Атна вакыйгалары» газетасы тәкъдим итә.
Камыр өчен кирәк: 2 йомырка, 100 г шикәр комы, чеметем тоз, ванилин, 200 мл каймак, 200 г он, 2 чәй калагы камыр көпшәкләндергеч (разрыхлитель), 2 аш калагы көнбагыш мае.
Эчлек өчен кирәк: 3 йомырка, 500 г эремчек, 100 г шикәр комы, 2 аш калагы манный ярмасы, ванилин.
Рецептта күрсәтелгән продуктлардан коймакка кебек сыек камыр ясарга.
Аннары эремчекле эчлекне күпергәнче болгатып әзерләп куярга.
Табаны майларга, төбенә-кырыйларына он сибәргә һәм сыек камырны агызырга.
Камырның кырыйларына бик җиткермичә генә, уртасына калак белән эремчекле эчлекне салырга һәм өстен матур итеп тигезләргә.
Бәлешне газ мичендә 170 градуста 40-45 минут тирәсе пешерергә.
