Ялган онкологлар пенсионерларны талаган
Ялган онкологлардан кыйммәтле дару сатып алган пенсионерлар бурычларын өлешләп түләгән.
Чаллыда ялган онкологларны тоткарлаганнар. Алар сәламәт кешеләрне яман чир белән авыруларына ышандырган. Зур операциядә Россия Эчке эшләр министрлыгының Мәскәү структура бүлекчәсе хезмәткәрләре катнашкан. Бер үк вакытта Мәскәү, Чаллы һәм Казанда тоткарлау операциясе булган. Бу хакта «Челнинские известия» хәбәр итә.
Тикшерү материаллары буенча, җинаятьчел мошенниклар төркеме үз каналлары буенча өлкән яшьтәге кешеләрнең телефон номерларын алган. Ялган табиблар пенсионерларга шалтыраталар һәм, табиб-онкологлар буларак, аларда яман шеш барлыгы турында хәбәр итәләр.
Алар пенсионерларны нәтиҗәле, әмма кыйммәтле препаратлар бар дип тынычландырган. Даруларның бәясе 200 меңнән 700 мең сумга кадәр тәшкил иткән. Өлкән яшьтәге кешеләр ялган онкологларга акчаны өлешләп түләгән. Шулай итеп, мошенниклар алдау юлы берничә миллион сум акча үзләштергән.
Ялган табиблардан 25 кеше зыян күргәнлеге ачыкланган. Әмма тикшерү аларны күбрәк булырга мөмкин, дип саный.