Ялдан кайтып баручылар ялга баручылар белән бәрелешкән: 4 кеше һәлак
Фаҗига Саратов өлкәсендә була. Чиләбе өлкәсеннән "Ниссанда" диңгезгә ялга баручылар "Калинада" Башкортстанга ял итеп кайтучылар белән бәрелешә, дип хәбәр итә RUSdtp.
Шаһитлар әйтүенчә, "Ниссан" йөртүчесе йоклап киткән булырга тиеш. Машина юл читендәге киртәгә бәрелеп, каршы як полосага чыга һәм "Калина"ны бәрдерә. "Ниссан"ның йөртүче ир һәм аның ике яшьлек кызы, "Калина"дагы ике пассажир - хатын-кыз һәм аның 16 яшьлек улы үлә.
"Калина" йөртүченең аяклары сына, баш мие селкенә, 4 яшьлек улы башын бәрә.
"Ниссан" пассажиры умырткасын имгәтә, башын бәрә. Фаҗига булган көнне туган көне булган 7 яшьлек улы да сырхауханәгә эләгә.
"Ниссан" йөртүче ирнең машина йөртү таныклыгы булмый. Машина аның хатыныныкы була, алар чиратлашып йөрткәндер, дип фаразлый "Башинформ".
