Ябыгу өчен дарулар эчкән 19 яшьлек кызның ашказанында 20 сантиметрлы шеш барлыкка килгән
19 яшьлек кыз ябыгу өчен дарулар аркасында чак кына үлми калган. Аның ашказанында зур шеш барлыкка килгән.
Мәскәү өлкәсендә яшәүче студент кыз 1-2 килограммга ябыгырга теләгән һәм интернетта авырлыкны киметү өчен дарулар сатып алган. Әмма сәер дарулар кабул иткәннән соң берничә ай узгач, кыз эче авыртудан, күңел болгану һәм косудан зарлана башлый. Бу хакта SHOT телеграм-каналы яза.
Студент кыз Красногорскидагы хастаханәгә мөрәҗәгать итә, чөнки авыртулары көчәя генә бара, һәм берни дә ярдәм итми. Тикшерүдән соң табиблар аның ашказанында 20 см зурлыктагы шеш табалар. Кызга ашыгыч рәвештә операция ясыйлар.
Хәзер зыян күрүченең сәламәтлегенә куркыныч янамый. Әмма хастаханәдә аны табиб белән киңәшмичә препаратлар кабул итү куркынычы турында тагын бер кат кисәткәннәр.