Яңа Шигали авылыннан чыгып киткән бабай югалган
74 яшьлек ир-ат телефонын алып шалтыратуга җавап бирә, тик кайда булуын әйтә алмый.
Питрәч районының Яңа Шигали авылында яшәүче 74 яшьлек бабай югалган. Бу турыда «Татар-информ» агентлыгы хәбәр итте.
Бабай югалу турында 17 сентябрьдә 19.48 сәгатьтә хәбәр итәләр. Ул өйдән чыгып китә һәм әйләнеп кайтмый.
Бабайның үзе белән телефоны да була. Ул шалтыратуга җавап бирә, тик кайда булуын әйтә алмый. Аны икенче көнне иртәнге бишкә кадәр эзлиләр, аннары көндез тагын эзләү дәвам итә.
Ул кара төсле чалбар, ачык-соры төсле куртка һәм зәңгәр кепка кигән.
Ир-атны полиция, волонтерлар эзли. Алар «Царево village» торак комплексы янындагы урыннарны, күлне дә карап чыккан, тик бабай табылмый.
«Лиза.Алерт» төркеме волонтерлары бабайны эзләү дәвам итүен яза.