Яңа ел төнендә бер этнең авызында петарда шартлатканнар
«Бер хайван да үз ихтыяры белән авызына петарда капмый. Этләр уттан курка», — дип сөйли хайваннарны яклаучы.
Кузбасс өлкәсенең Мыски шәһәре янындагы Чувашка авылында Яңа ел төнендә бер этнең авызында петарда шартлаган. Бу турыда «Комсомольская правда« хәбәр итте.
1 гыйнварда авылдагы йортларның берсе янына эт килә. Аның башыннан кан ага, яңагы өзелгән, аскы казналыгы сынган, тешләре дә төшеп беткән. Этнең авызында петарда шартлаганы ачыклана.
«Мин бу эшне кешеләр эшләгән дип уйлыйм. Алар этнең авызына петарда куйган. Бер хайван да үз ихтыяры белән авызына петарда капмый. Этләр уттан курка», — дип сөйли хайваннарны яклаучы Евгения Морошкина
Хәзер эткә волонтерлар ярдәм итә. «Бу ана эт, ул бик чыдам, ягымлы эт. Матур һәм зур. Без аңа Лаки дип исем куштык. Ул бер дә ыңгырашмый, уламый да, ул авыртуга акрын гына түзә», — ди волонтерлар.
Хәзер этне Новокузнецк шәһәрендәге ветеринария клиникасына илткәннәр. Аңа рентген ясаганнар, тукымаларын теккәннәр. Лакиның термик пешүе дә бар, хәзер аның тиресе үлекләмәсен өчен тырышалар. Аннары казналыгын төзәтергә җыеналар.
Хайваннарны яклаучылар полициягә гариза язган. Хәзер этне имгәткән кешеләрне полиция эзли, диелә хәбәрдә.