Йөрәк-кан тамырлары авыруларын кисәтү өчен 5 киңәш

Инфаркт яки инсульт белән очрашканчы, кеше еш кына гипертониядән: даими рәвештә яки вакыт-вакыт артериаль кан басымының (терекөмеш баганасы буенча 140/90 миллиметр һәм аннан югарырак) күтәрелүеннән интегә.

Артериаль кан басымы күтәрелүнең төп билгеләре түбәндәгеләр: баш авырту, баш әйләнү, йөрәк тибешенең ешаюы, йөрәкнең өзек-өзек тибүе, мускулларның хәлсезлеге, тын кысылу. Әмма кан басымының күтәрелүен тоймый торган кешеләр дә бар.

• Гипертонияне кисәтү өчен кайбер кагыйдәләрне үтәү зарури:

- Тәмәке тартуны ташларга, артык авырлыктан котылырга, алкоголь эчемлекләрен чамадан тыш кулланмаска кирәк.

- Гәүдә авырлыгын контрольдә тоту шарт.

Кеше тазарып, артык килограммнар җыйса да, уйланырга сәбәп бар дигән сүз. Бу очракта да гипертониягә тиз бирешәсең, дип ышандыра табиблар.

- Төрле факторлар - тәмәке тарту, симерү һәм стресслар гипертония авырулары, инсульт яки миокард инфаркты барлыкка килү куркынычын арттыра, - ди Республика медицина профилактикасы үзәге белгечләре.

Әгәр гаиләдә кемдер йөрәк-кан тамырлары авыруларыннан интексә, сәламәтлеккә аеруча игътибарлы булырга кирәк.

- Тартуны ташлагыз, күбрәк хәрәкәтләнегез һәм җәяү йөрегез. Холестерин күләмен белеп тору да бик мөһим, - дип киңәш итә Төбәкара клиник-диагностика үзәгенең «Кардиология» юнәлеше җитәкчесе, ТР Сәламәтлек саклау министрлыгының баш штаттан тыш кардиологы Альберт Галәвич.

Кан басымы терекөмеш баганасы буенча 140/90 миллиметр һәм аннан югарырак булса, табибка мөрәҗәгать итәргә кирәк.

Әгәр артериаль кан басымы билгесез сәбәпләр аркасында терекөмеш баганасы буенча 140 миллиметрдан югарырак булса, кичекмәстән табибка күренегез.

- Кан басымы 140/90 миллиметрдан югарырак яки 90 миллиметрдан түбәнрәк (яисә әлеге күрсәткечләрнең берсе яки икесе дә), кандагы шикәр яки холестерин күләме югарырак икән, табибка мөрәҗәгать итәргә һәм тикшеренүләр комплексы үтәргә кирәк, - дип искәртте Казанның баш кардиология Зөлфия Ким.

Диспансеризация – барлык авыруларны контрольдә тотуда яхшы алым.

Казанның баш кардиологы Татарстан халкына диспансеризация һәм предприятиеләрдә профилактик медицина тикшеренүләренә аерым игътибар бирергә киңәш итә.

- Мондый профилактик тикшеренүләр вакытында табиб кеше сәламәтлегендәге үзгәрешләрне ачыклый һәм мәкерле авыруларның үсешенә чик куя ала, - диде Зөлфия Ким.

Өлкән яшьтәге кешеләр диспансеризацияне өч елга бер тапкыр үтәргә тиеш. Гражданинга беренче диспансеризация — 21 яшьтә, шуннан соң өч ел саен бөтен гомере дәвамында үткәрелә. Бөек Ватан сугышы инвалидлары һәм ветераннары, һәлак булган (үлгән) ветераннар һәм инвалидларның хатыннары, ничә яшьтә булуларына карамастан, диспансеризацияне ел саен уза.