Йөрәк-кан авыруларын булдырмас өчен нинди ризыклар ашарга?

Галимнәр сөт ризыклары белән туклану йөрәк-кан тамырлары системасына уңай йогынты ясавын ачыклаган. Бу хакта Food News порталына сылтама белән РИА Новости яза.

Галимнәр сөт һәм ит белән беррәттән, составында май күп булган чиста ризыклар да йөрәк өчен файдалы дигән нәтиҗәгә килгән.

“Безнең тикшеренүләр сөт ризыкларының йөрәк өчен файдалы һәм гомер озынлыгын арттыруга сәләтле булуын күрсәтә. Бу хәзерге диетологларның киңәшләреннән аерыла”, - дип сөйләгән әлеге хезмәт авторларының берсе, Канаданың Макмастер университетыннан Салим Юсуф.

Фәнни төркем 50 дән артык илдән җыелган 218 кеше белән тикшерү уздырган. Пациентларны рацион составына бәйле рәвештә биш төркемгә бүлгәннәр. Күпләп җиләк-җимеш, яшелчә, чикләвек, кузаклылар, балык, ит һәм сөт продуктлары ашаучыларда йөрәк-кан тамырлары авырулары барлыкка килү куркынычы бик түбән булуы ачыкланган.

Шулай ук сөт ризыкларының һәм эшкәртелмәгән итнең йөрәк өчен файдалы булуы ачыкланган.