Өй белән койма арасыннан баручы хатынны түбәдән төшкән кар басып үтергән
Мәрхүмәнең мәетен өч метр калынлыктагы кар астыннан тапканнар.
Ленинград өлкәсенең Всеволжский районында яшәүче хатын кар астында калып, һәлак булган. Калын кар катламы ике катлы йорт түбәсеннән шуып төшкән. Бу турыда ТАСС хәбәр итте.
Фаҗига 17 февральдә була. Порошкино авылында яшәүче 60 яшьлек хатынга балалары шалтырата, тик трубканы алучы булмый. Шуннан соң алар авылга кайталар һәм коткаручылар чакыралар.
Коткаручылар пенсионер хатынның мәетен өч метр калынлыктагы кар астыннан табып ала. Мәрхүмә хатын йорт белән койма арасында булганда, аның өстенә түбәдән кар ишелеп төшә. Шулай итеп ул тереләй килеш кар астында күмелеп кала һәм һәлак була, диелә «Вести» каналы хәбәрендә.