«Хыянәтче иренә үч». Күп балалы хатын кызының башына балта чаба, икенче баласын яралый
25 июньдә Красноярск краеның Курагино бистәсендә яшәүче хатын кызын үтерә. тагын бер баласын яралый. Ул шулай итеп иренең хыянәте өчен үч алмакчы була. Бу турыда Тикшерү комитетына сылтама белән «Вести» каналы хәбәр итте.
Фаҗига күп балалы гаиләдә була. Хатын ирен хыянәт итә дип шикләнә, иреннән үч алу өчен, балаларына һөҗүм итә. Исерек килеш әни кеше 3 яшьлек кызының башына һәм муенына балта белән чаба, бала урында ук үлә. Аннары пычак ала һәм 8 яшьлек кызының муенын яралый – бала исән кала, аны хастаханәгә китергәннәр.
Әлеге вакытта өйдә тагын бер бала – 6 яшьлек кыз була, аңа зыян килмәгән. Әти кеше бу вакытта эштә була.
Аннары бу хатын дустына шалтыратып, барысын да сөйләп бирә. Хәзер аны тоткарлаганнар, тикшерү бара, диелә хәбәрдә.