Казанның Борисоглебское бистәсендә ут капкан өй ишелеп төшкән. Бу турыда «Татарстан 24» каналы хәбәр итте.
2 катлы агач йорт кич белән яна башлый. Сәбәбе әлегә ачыкланмаган. 120 квадрат метр мәйданлы өй тулысынча янып беткән.
Ут чыкканда хуҗалар өйдә булмый, аларга телефоннан хәбәр итәләр.
Янгынны беренче булып күршеләр абайлап ала – алар төтен күрә һәм шартлау тавышы ишетә. Ут бик тиз арада бинаны чолгап ала.
Янгын сүндерүчеләр бик тиз килеп җитү сәбәпле, күрше йортларны уттан саклап калалар. Ләкин кайсыбер йортларга зыян килә – ялкын аларның тышкы пластик эшләнмәләрен эретә.
Якынча белешмә буенча, янгын тышкы чыганак йогынтысында яки янгынга каршы кагыйдәләрне бозу сәбәпле чыккан булуы ихтимал.
Фаҗига вакытында хуҗалар дачада була, алар кайтканда өйдән хәрабәләр генә калган, диелә хәбәрдә.