Мөмкинлекләре чиклеләр – хезмәткә хокуклы

Татарстан Республикасының Дәүләт хезмәт инспекциясендә мөмкинлекләре чикләнгән хезмәткәрләр категориясе аерым контрольдә тора. Инвалидларның хезмәт эшчәнлеге белән шөгыльләнү мөмкинлекләрен регламентлаучы төп норматив документлар булып Россия Федерациясе Хезмәт кодексы һәм «Россия Федерациясендә инвалидларны социаль яклау турында»гы 181-ФЗ номерлы федераль закон тора.

Инвалидларга хезмәт белән тәэмин итү гарантияләре бирелә: оешмаларда инвалидларны эшкә алу өчен квота һәм алар өчен минималь махсус эш урыннары билгеләү, инвалидларны эшкә урнаштыру һәм аларга индивидуаль реабилитация программалары нигезендә хезмәт шартлары тудыру өчен иң кулай һөнәр буенча эш урыннарын резервлау.

Инвалидны эшкә алу Россия Федерациясе Хезмәт кодексы нигезендә барлык хезмәткәрләр өчен каралган гомуми тәртиптә башкарыла.

Инвалидларны эшкә урнаштырганда эш бирүчегә Россия Федерациясе Хезмәт кодексы 65нче статьясы нигезендә документлар бирелә, ә ташламалардан һәм гарантияләрдән файдалану өчен өстәмә – медик-социаль экспертиза белешмәсе тапшырырга кирәк, анда инвалидлык төркеме һәм хезмәт эшчәнлегенә сәләтне чикләү дәрәҗәсе һәм индивидуаль реабилитация яки абилитация программасы күрсәтелә.

Хезмәт килешүе төзегәндә, эш бирүче хезмәт килешүендә бирелә торган ташламаларны һәм махсус хезмәт шартларын күрсәтергә тиеш.

Россия Федерациясе Хезмәт кодексы 92нче статьясы һәм «Россия Федерациясендә инвалидларны социаль яклау турында»гы закон нигезендә I һәм II төркем инвалидлар өчен эш вакыты кыскартылган – атнасына 35 сәгатьтән дә артык түгел. I яки II төркем инвалидлар өчен эш вакыты атнага 35 сәгатьтән артмаса да, тулы хезмәт хакы саклана.

Инвалидларны эштән тыш эшләргә, ял көннәрендә, бәйрәм көннәрендә һәм төнлә эшкә җәлеп итү, шулай ук командировкага җибәрү аларның ризалыгы белән һәм сәламәтлек торышы буенча мондый эшләр тыелмаган очракта гына рөхсәт ителә.

Инвалидлар өчен еллык түләүле отпуск ким дигәндә 30 календарь көн тәшкил итә, шулай ук елына 60 календарь көнгә кадәр, хезмәт хакын саклап калмыйча, ялга хокуклы.

Коллектив яки хезмәт шартнамәләрендә инвалидларның хезмәт шартларын (хезмәт хакы, эш вакыты һәм ял вакыты режимы, ел саен өстәмә түләүле отпусклар озынлыгы һәм башкалар) билгеләү, башка хезмәткәрләр белән чагыштырганда инвалидларның хәлен начарайтуга юл куелмый.

Сезнең хезмәт хокукларыгыз бозылган яки консультация кирәк булган очракта, сез Дәүләт Хезмәт инспекциясенә, РФ Дәүләт хезмәтләре Порталы аша гариза бирү юлы белән, шулай ук Казан шәһәре Мәрҗани урамы 48нче йорт адресы буенча инспекциягә шәхси килү юлы белән мөрәҗәгать итә аласыз.

Татарстан Республикасында Дәүләт хезмәт инспекциясе җитәкчесе урынбасары Зәйнетдинова Алсу Хәмит кызы

тел. 5282790.