Бөгелмәдә яшәүче ир, хатынына үзе турында әйткән өчен, сөяркәсен елгада батырып үтергән

Бөгелмә елгасында 14 апрельдә 46 яшьлек хатынның мәетен табалар. Аны кабыргалары сынганчы кыйнаганнар һәм елгада батырып үтергәннәр.

«КП» язуынча, җинаятьтә гаепләнүчеләрне тиз тапканнар. Алар Бөгелмәдәге автомастерскойда эшләгән 3 ир, аларның иң яшенә 17 генә яшь.

Үтерелгән хатын шушы ирләрнең берсе белән очрашып йөргән. 27 яшьлек ир өйләнгән кеше була. Сөяркәсе ирнең хатынына иренең «сулга йөргәнен» хәбәр итә һәм боларның гаиләсендә гауга чыга. Ачуы чыккан ир, автосервистагы ике иптәшен ияртеп, сөяркәсе янына килә. Хатынны кыйный башлыйлар. Башта аны ваннада батырып үтермәкче булалар, хатын аңын югалта. Аннары бу өч ир такси чакырта. Таксистка аңын югалткан хатынны исерек дип әйтәләр һәм елгага барырга кушалар һәм шунда аны батырып үтерәләр.