Хатынына ире үлгән дигән похоронканы ялгыш җибәрәләр: 80 яшьтә янәдән бер-берсен табалар

Билгеле булганча, 1945 елга кадәр хәзерге Калининград Кенигсберг дигән исем йөрткән һәм немец шәһәре булган. 1945 елның апрелендә шәһәр штурм нәтиҗәсендә совет гаскәрләренә күчә һәм Калининград дип атала башлый.

Калининград Кенигсберг булган вакыттан калган немецлар яшиме хәзер, дип сорадык гидтан. Гид бик кызыклы, дөресрәге, бик кызганыч язмышлы хатынның тарихын сөйләп китте. Шуны сезгә дә сөйлисе килә...

1944 елны Хельга ире Хельмутның үлүе турында «похоронка» ала. Хельга 2 кечкенә баласы белән кала.

1945 елның апрелендә Кенигсберг шәһәре СССРга күчә. Немецларга үз илләренә китәргә кушыла. Гомер буе шушы шәһәрдә яшәгән Хельга чит шәһәрдә иреннән башка 2 бала белән яңа тормыш башларга тиеш була. Ләкин язмыш башкача борып куя.

Хельгага сугыштан кайткан өйләнмәгән егет Василий Петров гашыйк була һәм аңа өйләнә. Петровның дуслары күп була, һәм ул Хельгага башка исем белән документлар ясап бирә. Милләте белән ул немец хатыны түгел, литвалыга әйләнә. Исеме дә Хельга түгел, Ольгага үзгәртелә.

Ольга белән Василий тормыш итә башлыйлар, аларның тагын 2 баласы туа. Күпмедер вакыт узгач, Петровның сугышта алган яралары борчый, ул үлеп китә. Әби дә инде 80не тутырган. Өйдән дә чыкмый, көн дә үлем көтә.

Көннәрдән бер көнне Ольга әбинең тарихын күршеләре, нәкъ менә безнең гид белә. Аның оныгы әбинең метрикасын шушы безнең гидка күрсәтә. Шаккаткыч хәл белән ул кызыксынып китә. Бу хәлне ул вакытта телевизордан барган «Ищу тебя» тапшыруы кебек тапшыруга язып җибәрәләр. Әбинең Германиядә булган туганнарын эзләп карыйсылары килә.

Туганнары табылмый. Беләсезме кем табыла? Хельганың ире. Үлгән дип саналган ире. Хельгага «похоронка»ны бутап җибәргәннәр. Хельмут исән булып чыга. Сугышта ул бик каты яраланган, контузия алган, бик озак аңсыз яткан. Яралары төзәлгәч, ул үзенең гаиләсен эзли, Германиягә китүчеләр арасында да, Кенигсбергта калучылар исемлегендә дә аларны тапмый. Чөнки хатынының, балаларының исеме һәм фамилиясе үзгәртелгән була.

Хельмут гаиләсе исән түгелдер дип уйлый. Яңа гаилә кора, балалары туа…

Бик күп еллар уза.

Хельганың һәм балаларының исән булуын белгәндә, аның аяклары йөрми торган була инде. Бу хәлләр ике якны да тетрәндерә. Өеннән дә чыкмаган 80не узган әби Хельга Германиягә беренче ире янына җыена башлый. Ясана, бизәнә, матур күлмәкләр ала. Картлык көннәрендә ир белән хатын Германиядә очраша.

Дәвамы да бар...