Петербургта хатынын үтереп, мәетен тураклауда шикләнелүче ир-атны тоткарлаганнар. Бу турыда тикшерүчеләргә сылтама белән РЕН ТВ хәбәр итте.
Россия Тикшерү комитетының Петербург шәһәре буенча Тикшерү идарәсе хәбәр иткәнчә, «Үтерү» маддәсе буенча җинаять эше ачылган. Җинаятьтә шикләнеп биредә яшәүче 1978 елда туган ир-ат тоткарланган.
Тикшерү версиясе буенча, ир белән хатын талаша. Шуннан соң ир хатынын үтерә. Фаҗига Колпинодагы йортларның берсендә 22 февраль тирәсендә була. Үтергәннән соң, ир хатынның мәетен Гатчина районына алып китә, урманга илтә һәм мәетне кисәкләргә тураклый.
Хәзер бу ир-ат күрсәтмәләр биргән инде. Хатынның мәетенең кисәкләрен дә тапканнар.
Моңа кадәр Колпинода яшәүче бу ир-атның полициягә мөрәҗәгать итүе билгеле булган. Аның сүзләренчә, хатыны 2 мартта кич белән талашкач, өйдән чыгып киткән һәм әйләнеп кайтмаган. Ул хатынын табуны сораган булган, диелә хәбәрдә.