Казахстанның элекке милли икътисад министры Куандык Бишимбаевны хатыны Салтанат Нукенованы үтергән өчен 24 елга хөкем иттеләр. Бу хакта «База» Телеграм-каналы яза.
Ресторанда талашып киткәч, Бишимбаев хатынын үтергәнче кыйный, соңыннан, киңәш сорап, багучыга шалтырата һәм үзенең туганы, ресторан директоры Бахытжан Байжановтан күзәтү камералары язмаларын бетерүне сорый. Байжанов та, дәлилләрне яшереп калуда гаепле, дип табылды һәм 4 елга хөкем ителде.
Судмедэкспертлар ачыклаганча, Салтанат кыйналудан башы җәрәхәтләнеп вафат булган. Тикшерү версиясе буенча, Бишимбаев хатының башын йодрыклары белән төя, аннан Салтанат идәнгә егыла.
Бишимбаевка эш ачылгач, Казахстан сенаты гаиләдәге җәбер-золымны криминальләштерү турында законны хуплады. Закон кыйнаган һәм аңлы рәвештә сәламәтлеккә җиңелчә зыян салган өчен җинаять җаваплылыгы кертә, шулай ук аңлы рәвештә сәламәтлеккә уртача һәм авыр зыян салган өчен җәзаны кырысландыра.
