Казанның «Гаилә» мәчете имам-хатыйбы Рөстәм хәзрәт Хәйруллин хатын-кызларга җомга вәгазенә мәчеткә килергә ярыймы икәнен аңлатты. Бу турыда ул телеграмдагы сәхифәсендә сөйләде.
Хәзрәт хәдисләргә нигезләнеп аңлатма бирә.
«Пәйгамбәребез әйткән: Хатын-кыз ул – мәдрәсә. Алар мәчеткә килеп динне өйрәнсә, җомга намазын тыңласа, аннары шушы вәгазне үз балаларына, оныкларына сөйләсә, шуннан зуррак әйбер булмас.
Безнең «Гаилә» мәчетендә хатын-кызлар өчен керә торган урыннар, алар намаз укый торган урыннар аерым. Хөрмәтле хатын-кызлар, ирләрегез рөхсәт итә икән, җомга намазына көтәбез, килегез», – ди хәзрәт.