Хәтта хастаханәгә дә бармый торган әби Руслан Кираметдинов янына килгән: «Кайгырам, улым»

Руслан Кираметдиновның Казандагы концертына 84 яшьлек әби килгән. Ул моңарчы беркая да, хәтта хастаханәгә дә барганы булмаган, чөнки әбинең машинада «күңеле болгана» икән.

«Руслан, фәрештәң килгән», – ди әбине тыңлап торучылар.

Видеода күренгәнчә, Руслан әбине ихластан берничә тапкыр кочаклап ала.

«84 яшемә кадәр Казанның кырыен гына күргән кеше. Үләр вакытым җиткәч, шушы биналарны күрергә язган. Сине кочаклап үбәсем килә. Кызым телефоннан да җибәрә, телевизордан да карыйм. Синең өчен бик кайгырам, борчылам, улым. Алдагы көннәрдә иҗатыңда уңышка ирешергә язсын. Нинди максатың булса, шуңа ирешергә насыйп булсын», – ди ак яулыклы әби һәм җырчының кулларын тотып, теләкләр дә тели.

«Аны хастаханәгә дә алып барып булмый. Беркайчан беркая алып барып булмый. Салаватка да бармады», – ди әбинең кызы.