Хат иясен эзлиләр: бала махсус операциядәге әтисенә хат язган, исемен күрсәтергә оныткан

Бер бала махсус операциядә катнашучы әтисенә атап хат язган, ләкин аның исемен һәм адресын күрсәтергә оныткан. Хәзер хатны тапшыру өчен аның иясен эзлиләр. Әлеге дулкынландыргыч тарих турында сөйләп, бер хәрби видео яздырган. Ролик социаль челтәрләрдә таралды.

«Кичә 2023 елның 10 феврале иде. Артскладны җыештырганда, боеприпаслар салынган тартмада менә шундый хат таптык. Хат эчендә 1000 сум акча да бар. Хатка «Туган көнең белән, әтием» дип язылган, йөрәк һәм бәйрәм торты ясалган.

Бу хат кемгә адресланган икән? Бәлки, бу бала, үзен танып, хәбәр салыр. Кемгә атап язылганлыгы билгеле булса, без хатны һәм акчаны адресатына тапшырыр идек», – дип сөйли хәрби.