Украинадагы махсус операциядә катнашучыларны дискредитацияләгән өчен, 15 елга төрмәгә утыртырга мөмкиннәр. Дәүләт Думасы рәисе Вячеслав Володин шундый закон инициативасы кертелүе турында хәбәр итте.
Сүз барлык хәрбиләр – үз ирекләре белән катнашучылар да, хәрби бурычны үтәүче башкалар турында да бара. «Бу закон инициативасы, үз гомерләрен аямыйча, ил һәм безнең гражданнарның иминлеген тәэмин иткән һәркемне яклаячак», – дигән Володин.
Канун проектында 5 миллион сумга кадәр яки хокук бозучының соңгы 5 ел эчендәге хезмәт хакы күләмендәге штраф, 5 елга кадәр төзәтү эшләре, яки 15 елга кадәр иректән мәхрүм итү каралган.
Володин әйтүенчә, бу канунны кабул итүнең инициаторы «Вагнер» хосусый хәрби ширкәте җитәкчесе Евгений Пригожин булган.
Пригожин үз иреге белән хәрби хәрәкәтләрдә катнашучыларны, шулай ук элек төрмәдә утырганнарны яклауны сорый. Яклау дигәндә, махсус хәрби операциядә катнашучылар турында теләсә нинди тәнкыйди характердагы чыгышлар (социаль челтәрләрдә язу яки, әйтик, халык алдында чыгыш ясау) һәм шулай ук кешеләрнең элекке хокук бозулары турында язу тыелырга тиеш, дип саный Пригожин. «Вагнер» җитәкчесе фикеренчә, «кайбер мәгълүмат чаралары, «Телеграм» каналлар һәм блогерлар Россияне яклаучы, сезнең өчен гомерләрен аямаган кешеләрне ямьсез рәвештә, явыз һәм җинаятьче итеп күрсәтә».
Пригожин фикеренчә, иң зур җәза 5 ел булырга тиеш. Володин, аның инициативасы нигезендә, канунда төзәтмәләр әзерләргә фәрман биргән.