«Халык җәүһәре» Гөлнәзирә Талипова: «Татар эстрадасында чыккан низагларны аңламыйм»

Бүгенге көндә татар эстрадасы җырчылары арасында шактый гына низаглар чыгып тора. Эстрадада җыр өчен «көрәшүче», гауга куптарып, чебеннән фил ясаучы җырчылар күп. Әле, шуңа өстәп, «моң»нары белән халык мәхәббәтен яулый алмыйча, низагларга хайп өчен керүчеләр дә шактый.

Шулай да үз иҗат юлында әрләшми-талашмый, үз иҗат юлыннан тайпылмый баручы талант ияләре дә бар. Шуларның берсе – «Халык җәүһәрләре» халыкара милли-мәдәни фестиваль-конкурсының кунагы Гөлнәзирә Талипова. Ул татар эстрадасындагы низаглар турында үз фикерен әйтте:

Мин татар эстрадасында чыккан низагларны аңламыйм, нәрсә бүлешергә була ул? Һәрбер кешенең үз тавышы, үз таланты, үз юлы бит инде. Бүгенге фестивальдә катнашучылар да шундыйлардан – һәрберсенә хас аерым моң, сәләт бар.

Әгәр кеше чын мәгънәсендә җырларга ярата, иҗатка гашыйк икән, аңа Аллаһы Тәгаләдән талант бирелгән икән, ул үз юлы белән барырга, җырларга тиеш, дип уйлыйм. Бернинди көнчелек булырга тиеш түгел. Мәсәлән, мин үзем күңелемә нинди җыр ята, кайсы ошый – шуны башкарам. Аның сүзләре йөрәгемә якын, халыкка да барып җитә торган, алар тормышына якын булсын, дип сайлыйм. Шулай ук җырның көе күңелемә якын булмаса, мин аны җырлый алмыйм.

Низагланырга кирәкми, дип уйлыйм мин, киресенчә, җырчылар бер-берсенә комачауламыйча, сөенеп, берсен берсе сөендереп, үсендереп, һәр кеше үз юлы белән иҗат итеп яшәсен иде. Җырлар күп бит, һәркемгә җитә!»