Татарстанның халык артисты Винера Ганиева, Казанның «Пирамида» концертлар залына килгәч, үзенең бер сыңар алкасын югалткан. Социаль челтәрләр көченә өметләнеп, җырчы алканың фотосын үз сәхифәсенә куйган. Ул аны 23 сентябрь көнне төшереп калдыруы хакында яза.
«Хәере белән табылсын», – дип язып калдырган аңа Айгөл Бариева. «Болай гына яздым, Айгөл… Бәлкем, кемдер тапкандыр», – дип җавап биргән аңа Винера ханым.
«Берәрсе тапса, һичшиксез, китереп бирерләр, Винера ханым. Сезгә чыгу кыен түгел бит», «Чит алтынны үзеңә алырга ярамый, яхшыга түгел. Китереп бирерләр», – дигән өметтә калган аның язылучылары да.
