Владивостокта җылылык трассасы шартлагач, дистәләрчә машина җимерелгән - видео
Юл уртасында кайнар су фонтаны бәреп чыккач һавага күтәрелгән асфальт кисәкләре йорт тәрәзәләрен ваткан.
Владивосток шәһәрендә җирле вакыт белән 19.30 (Мәскәү вакыты белән 12.30) сәгатьтә җылылык трассасы шартлаган. Асфальт кисәкләре 20 тәрәзәне ваткан, дистәләрчә машина җимерелгән. Бу турыда «Вести» каналы хәбәр итте.
Куркуга калган бер машина йөртүчесе авария ясаган. Ул өстән коелган таш кисәкләреннән качмакчы була һәм чит кешеләрнең машиналарын бәрдерә. Аннары борыла да, авария урыннан качып китә.
Юлның әлеге участогында бер ай чамасы ремонт эшләре бара. Ләкин җылылык трассасын ясап бетереп, җылы су җибәрүгә, торбалар көчәнешкә чыдый алмый.
Видео кадрларыннан күренгәнчә, тип-тигез урында кисәк кенә кайнар су фонтаны бәреп чыга. Асфальт, җир кисәкләре һавага күтәрелә. Алар машиналар өстенә төшә, тәрәзәләрне бәреп вата. Кимендә тугыз фатир тәрәзәсе ватылып беткән.
«Атом сугышы кебек», — ди шаһитларның берсе.
Шәһәр хакимияте зыян күрүчеләргә компенсация вәгъдә итә, диелә хәбәрдә.