Владивостокта мэрияне 50 ел фатир көткән гаиләгә йорт бирергә мәҗбүр иттеләр
Эшне карау дәвамында гаиләдәге ике кеше вафат булган, шул сәбәпле фатирның тиешле мәйданы 72 квадратка кадәр кимегән.
Владивосток шәһәрендә муниципалитет аз керемле бер гаиләгә туры килә торган фатирны 49 ел дәвамында таба алмаган. Шул сәбәпле шәһәр суды мэрияне әлеге гаиләгә фатир бирергә мәҗбүр иткән, дип яза РИА Новости.
Владивосток поркуратурасы шәһәрдә яшәүче хатын-кызның Владивосток администрациясенең ваемсызлыгы буенча мөрәҗәгатен тикшергән.
«1972 елдан башлап хәзергә кадәр алты кешелек гаилә аз керемле буларак торак шартларын яхшырту өчен чиратта торган. Муниципалитет 50 елга якын аларга мәйданы туры килерлек фатир таба алмаган», — диелә хәбәрдә.
Прокуратура шәһәр администрациясенә әлеге гаиләгә социаль найм килешүе нигезендә фатир бирү бурычын йөкләү турында судка иск биргән. Эшне карау дәвамында гаиләдәге ике кеше вафат булган, шул сәбәпле фатирның тиешле мәйданы 72 квадратка кадәр кимегән.
«Владивосток шәһәренең Ленин районы суды карары белән прокурор таләпләре тулысынча канәгатьләндерелгән. Суд акты законлы көченә кергәннән соң, прокурор аны тормышка ашыруны контрольдә тотачак», — диелә хәбәрдә.
