Владимир Путинның мобиль телефоны бармы?
Президент мәгълүматны төрле чыганаклардан, шул исәптән интернеттан да ала.
Россия Президенты Владимир Путинның мобиль телефоны булмавын аның матбугат сәркатибе Дмитрий Песков әйткән. Бу хакта ул «Россия 24» каналына биргән интервьюда сөйләгән.
РИА Новости агентлыгы хәбәр иткәнчә, Президент мәгълүматны төрле чыганаклардан ала. Шул исәптән интернеттан да ала, дип төгәллек керткән Песков.
«Кәгазьдә язылган мәгълүмат тупланган папкалар, дайджестлар, телевизион дайджестлар бар. Алар бик күп төрле», — дигән матбугат сәркатибе.
Озак вакыт самолетта очканда Владимир Путин компьютердан интернетка керә, дигән ул. Шул ук вакытта Путинның шәхси мобиль телефоны юк. «Мин белгән кадәресе — аның телефоны юк», — дигән Песков.
Ул Кремльдә ябык элемтә каналларын куллануларын сөйләгән. «Хакимият өчен ябык элемтә телефоннары бөтен смартфоннардан да озаграк яшәр», — дигән матбугат сәркатибе.