Виталий Агапов туган авылында чиркәү ачкан
Чиркәү Виталий Агапов һәм башка меценатлар акчасына салынган.
ТР халык артисты, композитор Виталий Агаповның туган авылында чиркәү ачылган. Чиркәү берничә ел эчендә Виталий Агапов башлангычы һәм барлык сәвәләйлеләр көче белән салынган. Бу хакта «Интертат» хәбәрчесенә җырчы үзе хәбәр итте.
«Эш көне булуга карамастан, бу изге чарага бихисап күп халык җыелды. Зәй районы башлыгы Разиф Кәримов та килгән иде. Әлмәт һәм Бөгелмә епискобы Мефодий гыйбадәтханәне изгеләндерү чинын үткәрде. Бүген яңа гыйбадәтханәдә беренче илаһи литургия дә уздырылды. Хәзер бу чиркәү үз эшен башлап җибәрә. Ул тулы көченә халыкка хезмәт итәчәк. Чиркәвебезгә кеше йөрүдән беркайчан да туктамасын иде», — ди Виталий Васильевич.