Ясалма интеллект Владимир Жириновский партия билеты алып, декабрьдә партиянең якынлашып килүче съездында ЛДПР әгъзасы булырга мөмкин. Бу хакта РИА Новости хәбәр итә.
«Декабрьдә Президент сайлаулары алдыннан узачак ЛДПРның якынлашып килүче съездында партия таныклыгын кешегә түгел, ә ясалма интеллектка бирү мәсьәләсе чыгарылачак», – диелә хәбәрдә.
Партия уставы буенча, документларны Россия гражданына гына бирергә мөмкин. Хәзерге вакытта ЛДПР җитәкчелегендә партиягә нигез салучыны мәңгеләштерү мөмкинлеген хәл итәләр.
Кеше сорау биргәч, ясалма интеллект сәясәтченең тавышы белән җавап бирәчәк. ЛДПРда «Жириновский»ның төп бурычы мәгърифәтчелек булачак.
Әгәр нейросеть партиягә кабул ителсә, бу – партиянең уставын бозу булачак, чөнки ЛДПРга бары тик кешеләр генә кабул ителә ала.
- Жириновский 2022 елның 6 апрелендә 75 яшендә вафат булды. Ул 1990 елдан ЛДПР партиясе белән җитәкчелек итә.
-
2023 елда Жириновскийның рәсми чыгышларыннан чыгып, ясалма интеллект – нейросеть барлыкка китерелде. Ясалма интеллект, Жириновскийның элекке чыгышлары нәтиҗәсендә, яңа текстлар формалаштыра, сорауларга җавап бирә ала. Ул беренче тапкыр Петербургтагы икътисади форумда 15 июньдә чыгыш ясады.