ВИЧ инфекция ризык аша йогарга мөмкинме?

Россиядәге һәр унынчы кеше ризык яки гомуми савыт-саба аркылы ВИЧ инфекциясе йога дип уйлый. Мондый мәгълүматларны Росстат бирә дип яза "АиФ" басмасы. 

ВИЧ инфекциясе һава-тамчы юлы белән, шулай ук савыт-саба, аш-су җиһазлары, ризык яки урын-җир аркылы күчми. Кеше организмына вирус бары тик организм сыеклыгы аша (кан, лимфа, вагиналь һәм ректаль бүлендекләр, сперма һәм ана сөте) гына керә ала. Сакланмыйча җенси мөнәсәбәткә керү һәм авыру кеше белән бер шприц куллану иң киң таралган зарарлану төрләре. 

"ВИЧны савыт-саба яки ризык аркылы йоктырып булмый. Вирус көнкүреш предметлары һәм ризыклар аша күчми. Нинди дә булса биолгик материал канга яки лимфага эләксә генә вирус йога", - дип аңлата эпидемиолог, СПИДка каршы көрәш һәм профилактика буенча Россия фәнни-методик үзәгенең фәнни хезмәткәре Олег Юрин.