Вьетнамда Россия туристлары утырган автобус юл-транспорт һәлакәтенә юлыккан, бер хатын-кыз һәлак булган. Бу хакта, Россия туриндустриясе берлегенә сылтама белән, РИА Новости хәбәр итә.
Авария бүген иртән Ламдонг провинциясендә булган. Нячангтан Хошиминга юл тотучы автобус автомагистральнең авария полосасында туктап торган йөк машинасына бәрелгән.
«Бер туристның аягы сынган, аны Хошимин хастаханәсенә салганнар. Тагын бер туристның аркасына зыян килгән», – диелә хәбәрдә.
Калган пассажирлар җиңелчә яралар алган, аларга медицина ярдәме күрсәтелгән. Вьетнам полициясе юл-транспорт һәлакәтенең сәбәпләрен ачыклый.
Социаль челтәрләрдә барлыкка килгән мәгълүмат буенча, һәлак булган хатын-кыз Казаннан булган. Ике көн элек 38 яшьлек туроператорның туган көне булган. Ул балигъ булмаган өч баланың әнисе булган.