Танылган телетапшырулар алып баручы, журналист Венера Аитова әнисе белән рәхәтләнеп сөйләшә-сөйләшә кофе эчкән.
– Әнием, карале, авылда яшәгәндә «көпә-көндез эше беткән кеше кебек утыру» дигән комплекс бармы әле синдә?
– Мин хәзер бөтенләй комплекссыз.
– Ничә яшьтә бетә ул?
– 65 яшьтә дә рәхәт. 60та да рәхәт. Пенсиягә чыккач, сәгатькә карамыйча вакытны үзең контрольдә тоту – иң рәхәт вакыт. Бөтен эшеңне ташлыйсың да бер эшең дә юк кебек чыгып китәсең. Аннары кайтасың да калган эшеңне дәвам итәсең...
– Эш бетми?
– Беркайчан да бетми, кайтуга бетеп куйганы юк.
«Иң кызыгы: әнием безне башкача тәрбияләде. Хәзер: «Эш бетми ул, кайтканыңны көтеп тора!» – ди.
«60+ дә карашыңны үзгәртә алу, үзеңнән көлә белү сәләте, ялгышларны тану, мизгелдән тәм табарга яратуы – миңа үрнәк!
Рәхәтләнеп, көлешеп, бакчага чыгып, кофе эчеп утырган чаклар шушында истәлеккә калсын әле», – дип яза журналист.