Ваемсызлык аркасында фаҗига: «Яшь әни тәрәзәдән чыга, 3 бала ишелгән түшәм астында кала»

Быел июньдә Красноярск краеның Богучанский районында әни кешенең ваемсызлыгы аркасында 3 бала янып үлгән. Хәзер җинаять эшен тикшереп бетереп, судка тапшыралар. Бу турыда «Комсомольская правда» хәбәр итте.

Карабул авылында яшәүче 24 яшьлек хатынны «саксызлык аркасында үтерү» маддәсе буенча хөкем итәләр.

Тикшерү ачыклаганча, 2 июньдә ул өй верандасында кер юа торган машинаны эшләтеп җибәрә. Аннары резина исе чыга, хатын машинаны сүндерә, тик розеткадан тартып чыгармый. Өстәвенә, агач стена янынарак этеп куя.

Төш вакытында яшь әни күрше авылга кибеткә җыена. Күршедә яшәүче 13 яшьлек кызны чакырып, 2 баласын карап торырга сорый. Хатынның 6 айлык кызы һәм 2 яшьлек улы күрше кызы белән өйдә кала.

Яшь әни үзе өйдән чыгып китәргә дә өлгерми, янгын күрә – ватык машинадан ут балалар юрганына, аннары стенага каба.

Верандада янгын күргәч, хатын тәрәзә аша өйдән чыга, 13 яшьлек кыздан балаларын алып бирергә сорый. Тик үсмер кыз югалып кала, ул нәни балаларны алып килми. Янгын тиз арада тарала, түшәм ишелеп төшә. Шулай итеп 3 бала һәлак була, диелә хәбәрдә.