Узган төндә Казанда газ тарату станциясендә шартлау булды - видео
Һәлак булучы, имгәнүче кешеләр бар.
Узган төндә Казанның Төньяк-Көнбатыш урамында урнашкан газ тарату станциясендә сыекландырылган газ салынган цистерна шартлаган. Фаҗигадә бер кеше һәлак булды. Имгәнүче кешеләр бар. Бу турыда «Татар-информ» агентлыгына Татарстан буенча Гадәттән тыш хәлләр министрлыгының матбугат хезмәте хәбәр итте.
Төнлә белән ялкын уты берничә километр ераклыктан да күренә. Янгынны сүндерүдә йөздән артык кеше эшли. Һәлакәт урынына янгын сүндерү машиналары, махсус техника чакырылган.
Янгын сүндерүчеләр якындагы резервуарларга ут күчмәсен өчен тырыша. Станциядә сыекландырылган газ салынган 24 резервуар бар.
Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий сүзләренчә, шартлау куркыныч булган объектларда иминлек кагыйдәләрен бозу буенча җинаять эше ачылган.
Урында тикшерүче-криминалистлар эшли. Шартлау сәбәпләре ачыклана.
13 июньдә иртәнге 7 сәгатьтә булган мәгълүмат буенча, бу гадәттән тыш хәлне ликвидацияләү өчен җәлеп ителгән көчләр өчен «Гадәттән тыш» хәл режимында эшләү тәртибе кертелә. Бу турыда Россия Гадәттән тыш хәлләр министрлыгына сылтама белән РИА Новости хәбәр итте.
Якындагы торак йортларга куркыныч янамый, диелә бу хәбәрдә.