Шотландиядә яшәүче 63 яшьлек Стив Тернбулл сәламәтлеге белән беренче проблемаларны узган елда сизеп ала. Кичке аш вакытында яраткан ризыгын күргәч, кинәт аңарда җирәнү хисе туа, һәм аның күңеле болгана башлый. Бу вакытта гаиләдәге беркем дә моңа игътибар итми. Бу хакта «Российская газета» яза.
Икенче билге – ир-ат һәр җирдә шикәр мамыгы исен сизә башлый.
Алдагы этапта баш авыртулары, күрү һәм тигезлекне саклау белән проблемалары барлыкка килә. Шуннан соң гына ул табибка бара. Ашказаны һәм эчәклекләрендә барысы да яхшы була. Ир-атны МРТ тикшерүенә җибәрәләр, шунда барысы да ачыклана. Табиблар глиобластома – баш миендә агрессив шеш ачыклый.
Теннис тубы зурлыгындагы шеш, баш миенең билгеле бер өлешләренә тиеп, сәер реакцияләр тудырган була.
«Хәтта сәер симптомнар да – табибка барырга сәбәп», – дигән Стив журналистларга.
Ир-атка операция ясаганнар, шешнең зур өлешен алганнар. Аңа химиотерапия белән бергә 30 сеанс нурланыш терапиясе билгеләгәннәр. Хәзер пациент ремиссиядә, һәм ул йөри, туганнары белән аралаша ала башлаган, диелә хәбәрдә.
