Үзбәк егете, җиләк-җимеш сатучы Субхон Ахроров шагыйрә, күп җырлар авторы Эльвира Әхмәтованың «Мин үземчә» дигән шигырен күңелгә үтәрлек итеп сөйләгән. Видеороликны ул үзенең социаль челтәрләрендә күрсәтте.
Субхон турында «Интертат» язган иде инде. Ул Казанда яшәгән арада татар телен камил өйрәнгән, үзенең сәхифәләрен дә чиста татарча алып бара. Моннан тыш, Субхон татар җырлары яздыра, аларны башкара, шулай итеп, артистлар арасында да үз кешегә әйләнгән.
