1 сентябрьдән бакчачыларга кагылышлы берничә закон үз көченә керә. Шуларның берсе – бакчачылык ширкәтләре участокларында эшкуарлык эшчәнлеген алып баруны тыю. Бу хакта «Аргументы и Факты» яза.
Әлеге көн якынайган саен, бу канунга кагылышлы төрле хәбәрләрне очратырга мөмкин. Мәсәлән, кайбер Telegram-каналлар, көз башыннан үз участогыңда үстергән яшелчә һәм җиләк-җимешләрне сату тыелачак, дип яза. Бу – чыннан да шулаймы?
«Закон үз бакчаңда үстергән яшелчә һәм җиләк-җимешне сатуны тыймый, әмма моның системалы керем булмавын исбатлау мөһим, – дип аңлата юрист Юлия Саенко. – Әгәр сез үз кишәрлегегездә яшелчә, җиләк-җимеш, чәчәкләр үстерәсез икән, боларның барысын да ниндидер сертификатларсыз, лицензияләрсез һәм башка рәсми документларсыз сатарга мөмкин».
Моның өчен түбәндәге мөһим шартлар үтәлергә тиеш:
- Бакча кишәрлеге мәйданы 50 сутыйдан артмаска тиеш (бу – шәхси ярдәмче хуҗалык өчен максималь рөхсәт ителә торган зурлык санала).
- Сатуга куелган продукцияне бакчачы үзе, яки аның гаилә әгъзасы үстергән булырга тиеш (эшчеләр җәлеп итмичә).
- Күпләп сату яки хезмәт ресурслары, реклама һәм фискаль документлар булырга тиеш түгел. Моны чәчү мәйданнары зурлыгы раслый ала – мәсәлән, тулы бер кыр урынына 5 бәрәңге түтәле булу.
Әгәр сез терлекчелек продукциясен сатасыз икән – мәсәлән, ит, йомырка яки хәтта сөт, – монда инде башка кагыйдәләр гамәлдә булачак. Әгәр сүз үз түтәлеңдә үстергән укроп-кыярлар турында гына барса, проблемалар булмаячак. Контроль органнары белән проблемалар булмасын өчен, моны алдан кайгыртырга кирәк. Моның өчен бакчачылык ширкәтеннән белешмә алырга була.
Юлия Саенко аңлатканча, дачниклар үз продукцияләрен сезонлы ярминкәләр, җирле базарлар, кибетләр аша яки интернетта белдерүләр урнаштырып сата ала. Әмма шуңа игътибар итәргә кирәк, шәхси эшмәкәр буларак теркәлмичә даими рәвештә үз продукциясен сатучы дачниклар 500 сумнан 2000 сумга кадәр штраф алырга мөмкин, диелә хәбәрдә.