Рошаль исемендәге Балалар клиник үзәге хезмәткәрләре 16 яшьлек үсмернең ашказаныннан флешка алган. Бу турыда «Вести» каналы Мәскәү өлкәсе буенча Сәламәтлек саклау министрлыгына сылтама хәбәр итте.
Флешкада информатикадан өй эшләре булган.
Хәзер малайны хастаханәдән чыгарганнар инде.
Якынча белешмә буенча, үсмер өй эшен эшли, аны флешкага яздыра, аннары флешка белән уйный, бите каршында болгый һәм бер мизгелдә ялгыш йотып җибәрә.
Башта ул флешка үзе чыгар дип көтә, ләкин табигый юл белән флешка чыкмый. Аннары гаилә табибларга мөрәҗәгать итә.
Табиблар тиешле ярдәм күрсәткәч, икенче көнне баланы өенә кайтарып җибәрәләр.
Флешка эшли, үсмер өй эшен тапшыра алган, диелә хәбәрдә.