Нальчик шәһәрендә яшәүче 14 яшьлек үсмер аягын культиватор белән кискән. Аны доктор Рошаль клиникасына китергәннәр. Бик катлаулы ярасы булган баланы табиблар ампутациядән коткара. Аңа тулысынча дәвалану өчен ярты ел чамасы вакыт кирәк булачак, дип фаразлыйлар. Бу турыда «Московский комсомолец» хәбәр итте.
Үсмер абыйсына авылда җир эшкәртергә ярдәм итә. Дымлы туфракта аның аягы таеп китә, ул эшләп торган агрегатор астына барып керә.
«Ашыгыч ярдәм» белән баланы өлкә хастаханәсенә китерәләр. Табиблар ашыгыч балалар хирургиясе һәм травмотология фәнни институты белән телемедицина консультациясе оештыра. Бергәләп эшләп, баланың аягын ампутациядән саклап калалар. Хәле стабильләшкәч, аны Рошаль клиникасына китерәләр.
Хәзер баланы этаплап дәвалаячаклар. Хәзерге вакытта аның үкчәсендә һәм бармакларында тою хисе бар инде, ул аларны селкетә ала, диелә хәбәрдә.