Приморье крае Шумный авылында гөмбәчегә аю һөҗүм иткән. Ерткыч бу ир-атны аздан гына ботарлап үтерми калган. Аны авыр хәлдә хастаханәгә алып килгәннәр, хәзерге вакытта аңа медицина ярдәме күрсәтелә, дип хәбәр иткәннәр төбәкнең Сәламәтлек саклау министрлыгында. Бу хакта «Рен-ТВ» сайты яза.
«Вакыйга 28 августта Шумный бистәсе тирәсендә булган. Ир-ат гөмбәгә дип урманга барган. Аю ташланганнан соң, мөстәкыйль рәвештә өйгә кайткан. Туганнары аны шәхси транспортта хастаханәгә илткән», – дип хәбәр иткәннәр ведомствода.
Хастаханәгә алып килгәндә, ир-ат авыр хәлдә булган, әмма табиблар аның хәлен тотрыклыландыра алган. Хәзерге вакытта аңа барлык кирәкле медицина ярдәме күрсәтелә. Шул исәптән ир-атка йогышлы тартышу авыруына һәм котыруга каршы прививкалар ясаганнар.